Tre të arrestuar brenda dy ditëve për korrupsion

Përveç shefit të Task-forcës kundër korrupsionit, Nazmi Mustafi, policia ka arrestuar edhe dy persona tjerë nën dyshimin për korrupsion

Përveç shefit të Task-forcës kundër korrupsionit, Nazmi Mustafi, dhe bashkëpunëtorit të tij të dyshuar, Reshat Zherka, të cilët u arrestuan të hënën nën dyshimin për përfshirje në korrupsion, lidhur me dyshimet për shpërdorim të detyrës apo autoritetit zyrtar dhe ushtrimin e ndikimit, është arrestuar edhe një person i tretë, raporton REL. 

Mediat në Kosovë mësojnë se personi në fjalë të jetë arrestuar të martën në mëngjes në afërsi të kufirit me Shqipërinë, ndërsa nuk u përjashtua mundësia që bëhet fjalë për të vëllanë e Zherkës, Xhelal Zherka.

Zëdhënësi i EULEX-it, Nikollas Hotën, bëri të ditur se vendimin për vazhdimin apo jo të masës së arrestit pritet ta marrë një gjykatës evropian në një gjykatë në Pejë.

Ai rikujtoi se në çfarë dyshime bazohet hetimi i prokurorëve të EULEX-it.

“Dyshimet, të cilat po hetohen janë shpërdorim i detyrës zyrtare apo autoritetit zyrtar dhe ushtrim të ndikimit. Andaj, një gjykatës evropian pritet ta marrë vendimin për këtë çështje”, u shpreh Hotën.

Autoritetet kosovare dhe krerët e institucioneve të drejtësisë reaguan gjatë ditës ndaj arrestimit të Mustafit dhe vëllezërve Zherka.

Kryeprokurori i Shtetit, Ismet Kabashi, shprehu indinjatën e thellë për shkak se sic ka thënë ai, një prokuror i sistemit prokurorial dhe njëherësh udhëheqës i Task – forcës anti-korrupsion, në kuadër të Prokurorisë Speciale të Republikës së Kosovës, ka rënë në kundërshtim me ligjin dhe dyshohet të ketë kryer vepra penale, për luftimin e së cilave vepra kishte pozitë kyçe në sistemin prokuroria”.

“Padyshim, kjo është një goditje për sistemin prokurorial të Republikës së Kosovës, por gjithashtu, jam i bindur se për këtë sistem do të ishte goditje edhe më e rëndë sikur të mos e merrnim me seriozitet dhe përkushtim të plotë hetimin e këtij rasti që nga momenti kur kemi pranuar informatën e parë”, u shpreh Kabashi në një komunikatë dërguar mediave.

Kabashi inkurajoi EULEX-in për zbardhjen e rastit, ndërsa ofroi mbështetjen për hetimet që ky mekanizëm po i zhvillon ndaj të arrestuarve.

Veprimet e prokurorit, sipas Kabashit, “paraqesin në të njëjtën kohë edhe shkelje të Kodit të Etikës për Prokurorë, që mund ta vënë në pikëpyetje integritetin e sistemit prokurorial të vendit”.

Njëri nga të arrestuarit, Nazmi Mustafi, ishte emëruar në krye të Task-forcës kundër korrupsionit, themelimin e së cilës e pati inicuar kryeministri Hashim Thaçi, në vitin 2010.

Zëvendëskryeministri i Kosovës, njëherësh ministër i Drejtësisë, Hajredin Kuçi, shprehu bindjen që organet e drejtësisë ta kryejnë punën e tyre për ta zgjidhur rastin.

Edhe përfaqësues të shoqërisë civile, ndërkaq, shprehen shqetësimin për arrestimin e kreut të Task-forcës kundër korrupsionit dhe bashkëpunëtorëve të tij të dyshuar.