Ligji rregullon sferën e të papunëve dhe punëkërkuesve

Punëkërkuesit obligohen të paraqiten çdo tre muaj në zyrat e punësimit

Ligji për Regjistrimin e të Papunëve dhe Punëkërkuesve i miratuar nga Kuvendi i Kosovës do të rregullojë mënyrën, procedurat dhe kushtet e regjistrimit, evidencimin dhe çregjistrimin e të punësuarve dhe punëkërkuesve që rëndom kërkojnë punë nëpër zyrat e punësimit.　

Përmes këtij ligji janë rregulluar edhe disa përkufizime: si i të papunëve, punëkërkuesve, punëdhënësve, mbi kartelën e të punësuarve, aftësimet dhe riaftësimet profesionale, dhe mbajtja e evidencës së strukturave administrative. Si punëkërkues mund të regjistrohen personat mbi 18 vjeç.

　Hafiz Leka, shef i divizionit të punës dhe punësimit në Ministrinë e Punës dhe Mirëqenies Sociale, ka deklaruar se ky projektligj është në përputhje me standardet e BE-së, raporton radio Kosova.

Sipas tij, nuk do të ketë vështirësi në zbatimin e këtij ligji, për arsye se edhe më parë kanë pasur përvojë në regjistrimin e punëkërkuesve, ofrimin e aftësimeve profesionale dhe punësimin eventual të tyre.

Me këtë sistem, bëhet ndarja e punëkërkuesve në punëkërkues aktivë dhe pasivë. Me ligj, punëkërkuesit obligohen të paraqiten çdo tre muaj në zyrat e punësimit, e nëse nuk paraqiten, pas gjashtë muajsh, sistemi automatikisht i pasivizon ata.　

Mbikëqyrjen e zbatimit të këtij ligji do ta bëjnë shërbimet publike të punësimit, në bashkëpunim me departamentin ligjor të Ministrisë së Punës dhe Mirëqenies Sociale. Në bazë të statistikave zyrtare, gjatë vitit të kaluar, në zyra e punësimit, kanë qenë të regjistruar 325 mijë punëkërkues.