Në vitin e ardhshëm, rritja ekonomike 4.6 për qind

Ministri i Financave, Bedri Hamza tha se në vitin e ardhshëm do të financohen të gjitha politikat me prioritetet të qeverisë, do të ketë rritje të pagave dhe do të ketë financim të qëndrueshëm për skema sociale

Ministri kosovar i Financave, Bedri Hamza, në seancën e sotme të Kuvendit të Kosovës, ka thënë se në vitin 2018 rritja ekonomike e Kosovës është parashikuar të jetë 4.6 për qind, që konsiderohet solide për ekonominë e vendit. Ai këto deklarata i bëri në prezantimin e projektligjit për buxhetin, i cili sipas tij, është bërë me qëllim ruajtjen e stabilitetit fiskal.

“Me politikat tatimore do të jenë mbështetëse për zhvillimin e sektorit privat, ne do të bëjmë lehtësira të reja për prodhuesit dhe përpunuesit vendorë dhe kjo do të zhvillojë një ambient më të përshtatshëm për zhvillimin e bizneseve”, ka thënë ministri Hamza.

Te shpenzimet buxhetore, ai potencoi se do të financohen të gjitha politikat me prioritetet të qeverisë, do të ketë rritje të pagave dhe do të ketë financim të qëndrueshëm për skema sociale dhe kategoritë e dala nga lufta. “Në vitin 2018 rritja ekonomike e vendit përmes GDP do të jetë 4.6 për qind”, ka deklaruar ai.

Rritje të njëjtë sipas tij ka projektuar edhe Banka Botërore, madje kjo e fundit parasheh rritje më të lartë prej 4.8 për qind, apo 0.2 për qind më shumë se sa që ka parashikuar Ministria e Financave. Sipas tij, projektbuxheti për vitin e ardhshëm do të jetë mbi 2 miliardë eruo.