Skip to content

Përmbyllet projekti pesëvjeçar për modernizimin e sistemit të ngrohjes në Gjakovë, me mbështetjen e Zvicrës

Janë rinovuar gjashtë kilometra rrjet të tubacioneve, humbjet e ujit janë zvogëluar për mbi 90 për qind, ndërsa janë instaluar më shumë se 330 nënstacione të reja të ngrohjes.

Në Gjakovë është shënuar përfundimi zyrtar i një projekti pesëvjeçar për modernizimin e sistemit të ngrohjes qendrore, i realizuar me mbështetjen e Zvicrës, përcjell albinfo.ch.

Në ceremoninë përmbyllëse morën pjesë ambasadori i Zvicrës në Kosovë, kryetari i Komunës së Gjakovës, drejtori ekzekutiv dhe përfaqësues të ekipit të Ngrohtores së Qytetit të Gjakovës, si dhe partneri zbatues NIRAS.

Projekti ka sjellë përmirësime të rëndësishme në infrastrukturën e ngrohjes. Gjatë realizimit të tij janë rinovuar gjashtë kilometra tubacione, janë zvogëluar humbjet e ujit për më shumë se 90 për qind dhe janë instaluar mbi 330 nënstacione të reja të ngrohjes. Investimet kanë përfshirë edhe përmirësimin e infrastrukturës së ngrohjes në Spitalin e Përgjithshëm Rajonal.

Përveç investimeve infrastrukturore, projekti ka përfshirë edhe forcimin e qeverisjes dhe menaxhimit të ndërmarrjes, trajnimin e stafit dhe vendosjen e sistemeve moderne të monitorimit, me synimin për ta bërë Ngrohtoren e Gjakovës më efikase dhe më të qëndrueshme.

Ambasada e Zvicrës ka theksuar se ky rezultat plotëson edhe investimet e Bashkimit Evropian në prodhimin e energjisë termike dhe elektrike nga biomasa, si dhe angazhimin dhe investimet plotësuese të Komunës së Gjakovës.

Përmes këtij projekti, Zvicra ka kontribuar në përmirësimin e shërbimeve publike dhe krijimin e një sistemi më efikas dhe më të besueshëm të ngrohjes për qytetarët e Gjakovës./Albinfo.ch