Gjermanët e bëjnë me autobus shtëpinë e pleqve në Skenderaj

Skenderaj pranoi një autobus, donacion i komunës Sigmaringen, i cili do të përdoret për nevojat e Shtëpisë për përkujdesjen e të moshuarve

Për të dorëzuar këtë donacion nga Gjermania të enjten në Skenderaj qëndroi  një delegacion i përzier gjerman, në të cilin bënin pjesë përfaqësues të KFOR-it, të kryesuar nga kolonel Holthusen, si dhe përfaqësues të bashkësisë së shoqatave “Round Table” nga komuna Sigmaringen, i kryesuar nga nënkryetari i kësaj shoqate, Martin Blattner, raportojnë mediat lokale në Kosovë.

Kolonel Holthusen, udhëheqës i të gjitha trupave gjermane të KFOR-it në Kosovë, ka treguar se e njeh mirë situatën në të gjitha pjesët e Kosovës, dhe i dinë nevojat e secilës komunë. Ai ka potencuar numrin e madh të të rinjve të papunësuar për të cilët ka thënë se duhet të bëhen përpjekje që ata të angazhohen në punë të dobishme për veten dhe komunitetin.

Ndërkaq, Martin Blattner, kryesues i delegacionit të qytetit Sigmaringen, shprehu kënaqësinë që me këtë donacion do të përfitojnë banorët e shtëpisë së këtushme për të moshuarit. Mysafirët nga Gjermania i falënderoi kryetari i Komunës Sami Lushtaku.