KFOR-i zhbllokon fshatrat shqiptare të Leposaviqit

Ushtarët amerikanë të KFOR-it kanë hequr disa barrikada të vendosura gjatë natës së mbrëmshme nga grupet serbe, duke zhbllokuar kështu tri fshatrat me shqiptarë të komunës së Leposaviqit. Amerikanët me makinerinë e tyre kanë punuar me intensitet.

Shefi i Zyrës për informim të KFOR-it, Uve Novicki, bëri të ditur se pas aksionit në fjalë janë të lira për qarkullim rrugët që çojnë për në fshatrat Cerajë, Bistricë dhe Koshtovë e Vllahisë.

Zyrtarja për marrëdhënie me publikun për Grupin Shumëkombësh të betejës Lindje, Xhoj Stab, ka deklaruar se aksioni ishte i përbashkët me banorët lokalë, meqë në largimin e zhavorrit morën pjesë edhe serbët e asaj pjese, raporton REL.

Përveç trupave amerikane mësohet se në aksion morën pjesë edhe trupat zvicerane të KFOR-it.

Serbët e veriut kanë shkaktuar pengesa në qarkullim që nga korriku i vitit të kaluar, kur Qeveria e Kosovës ndërmori aksionin për shtrirjen e autoritetit të saj edhe në këtë pjesë të vendit./albinfo&rel/