Qeveria kundër iniciativës “No Billag” për heqjen e taksës për Transmetuesin Publik

"Kjo iniciativë do të ishte e barabartë me një “vdekje të asistuar” për SRG-në ndërsa do të shkaktonte dëme të mëdha financiare për shumë radio lokale dhe private, ka thënë presidentja federale, Doris Leuthard

Keystone

Debati rreth Iniciativës “No Billag”, të drejtuar kundër pagesës së detyruar (taksën muore) që bëjnë zviceranët për transmetuesin publik vendor (SRG) sa vjen e po ashpërsohet. Ndërkohë që sondazhet tregojnë rritje të mbështetjes së iniciativës, shteti përpiqet të argumentojë dëmin që mund të shkaktojë kjo iniciativë.

Në këtë debat është inkuadruar sot edhe Këshilli Federal, duke shtruar argumentet e veta. Kjo iniciativë do të ishte e barabartë me një “vdekje të asistuar” për SRG-në ndërsa do të shkaktonte dëme të mëdha financiare për shumë radio lokale dhe private, shkruan srf.ch. Kështu ka thënë (ende) presidentja federale, njëherësh ministre për Komunikacion, ambient dhe Energji, duke iu referuar synimit të bartësve të iniciativës së përmendur.

Kjo rrezikon diversitetin dhe ndërtimin e opinioneve në Zvicër, transmeton albinfo.ch. Nëse do të kalohej në një financim thjesht komercial (heqje dorë të subvencionit nga shteti), do të rritej varësia e SRG nga financuesit privatë dhe koncernet e huaja. Dhe  me këtë rritet rreziku nga ndikimi politik i paradhënësve.

Zviceranët do të votojnë mbi iniciativën “No Billag” më 4 mars 2018.