Policia maqedonase pretendon se ka gjetur vrasësit e Smillkovcit

Sipas ministres Jankullovska, në mesin e 20 të arrestuarve ka edhe të dyshuar për lidhje me vrasjen e pesëfishtë në Smillkovc

Në një konferencë për medie, Ministria Punëve të Brendshme ka informuar sot për arrestimin e 20 personave. Sipas ministres së Punëve të Brendshme, Gordana Jankullovska, në mesin e tyre ka edhe të dyshuar për lidhje me vrasjen e pesëfishtë në Smillkovc të Shkupit.

MPB pretendon se të arrestuarit i përkasin “grupeve radikale islamiste”.”Në mesin e 20 të arrestuarve, ka persona të cilët drejtpërdrejtë janë të ndërlidhur me vrasjen makabre në liqenin e Hekuranës, pranë fshatit Smillkovc. Por, ka dhe të tillë për të cilët nuk kemi të dhëna konkrete se a janë të përfshirë drejtpërdrejtë në këtë vrasje. Ata po merren në pyetje për momentin, dhe pasi të realizohen hetimet, do të dalim me të dhëna tjera”, ka deklaruar Jankullovska.

Kryepolicja Jankullovska tha se numri më i madh i të arrestuarve janë nga Maqedonia, ndërsa në operacionin e koduar si “Monstra”, janë gjetur sasi e konsiderueshme armësh, ndërsa në aksion kanë marrë pjesë rreth 800 policë, njofton portali i gazetës Koha të Maqedonisë.

Aksioni i bastisjes dhe arrestimit në disa rajone shqiptare të Shkupit, nga Njësitet speciale të policisë së Maqedonisë, raportohet të jetë zgjeruar. Bastisje, përveç në Gazi Babë, Hasanbeg e Haraçinë, Koha merr vesh se janë kryer edhe në lagjet Shutkë, Fushë Topanë, Cerovë, ndërsa numri i të arrestuarve është ngjitur në mbi 12 persona. Të arrestuarit janë të profileve të ndryshme, nga pensionistë, automekanikë, shoferë, shitës librash…

Në orët e para të mëngjesit të sotëm njësitet speciale të policisë së Maqedonisë kanë kryer bastisje nëpër shtëpi në disa rajone shqiptare të Shkupit. Bastisjet, siç merr vesh jozyrtarisht KOHA, janë kryer në lagjen e Gazi Babës, Shutkë, në Hasanbeg, sikurse edhe në fshatin Haraçinë. Tani për tani nuk dihen arsyet e bastisjeve, por raportohet se janë arrestuar dhjetëra shqiptarë.

Ndërkohë, në këto lagje të banuara kryesisht me shqiptarë, vërehen patrullime të shumta të policisë dhe njësiteve tjera të saj, raporton Koha dhe mediet tjera në gjuhën shqipe në Maqedoni.