Kosovarët së shpejti me ID biometrike

Me ndryshimin e ligjit krijohet baza për nxjerrjen e letërnjoftimeve sipas standardeve ndërkombëtare

Qytetarët e Kosovës shumë shpejt do të pajisen me letërnjoftime biometrike, me të cilat do mund të kalojnë edhe nëpër shtetit e rajoni. Madje Maqedonia është shteti i parë i cili në parim ka arritur marrëveshje me Kosovën për kalim kufitar vetëm me letërnjoftime biometrikë.

Por, ky mbetet vetëm fillimi, sepse Qeveria e Kosovës vetëm të hënën miratoi vendimin për ndryshimin dhe plotësimin e Ligjit për letërnjoftime. Me këtë vendim ekzekutivi kosovar krijohet infrastruktura ligjore që i hapë rrugë pajisjes së qytetarëve me letërnjoftime biometrike.

Ministri i Rendit, Bajram Rexhepi tha se me ndryshimin e ligjit krijohet baza për nxjerrjen e letërnjoftimeve sipas standardeve ndërkombëtare. Po ashtu ai tha se Maqedonia është shteti i parë që ka pranuar qarkullim kufitar vetëm me letërnjoftime, por paraprakisht, sipas tij, duhet të bëhen ID-të.

Kryeministri Hashim Thaçi, ndërkaq ka kërkuar edhe nga shtetet fqinje që të aplikohet qarkullimi me letërnjoftime, si njëri nga kushtet themelore të BE-së për lëvizje të lirë dhe pa pengesa.

Ndryshe, qytetarët e Kosova me letërnjoftime mund të kalojnë nëpër shtetet e rajonit, kryesisht në Malin e Zi dhe në Serbi. Po ashtu edhe Shqipëria ka aplikuar kalimin e kufirit vetëm me letërnjoftime, por vetëm gjatë sezonit të verës, nga qershori deri në shtator. Pas kësaj periudha është rikthyer masa e kalimit të rregullte, me pasaportë.