“E dashur Shqipëri”, dokumentari i Eliza Dushkut

Aktorja e famshme shqiptare e Hollywoodit, Eliza Dushku, sjell dokumentarin “E dashur Shqipëri” me të cilin synon ta bëjë Shqipërinë një vend edhe më atraktiv për të huajt, raportojnë mediat në Tiranë.

“E dashur Shipëri.  Kam qenë gjithnjë kurioze dhe e hipnotizuar nga misteret e tua. Unë jam një shqiptare e Amerikës nga Bostoni. Gjyshërit e mi migruan në Amerikë në vitet 1940 dhe u larguan nga kjo jetë përpara se unë të lindja. Babai im më ka mësuar të jem krenare për gjakun tim shqiptar dhe tani është koha për mua që të zbulojë përsenë…”, kështu nis dokumentari  me titull “E dashur Shqipëri”.

Bëhet fjalë për një përmbledhje  të shkurtër të udhëtimit të saj në Shqipëri, në disa qytete kryesore si Berati, Gjirokastra, Vlora, Saranda etj.

Në të janë pasqyruar vizitat e saj në manastire, në plazhet e mrekullueshme të Shqipërisë, por edhe takimet me njerëzit e thjeshtë apo dreka me miqtë, që do t’i shtojnë kuriozitetin vizitorëve të shumtë.

Një video që pas postimit që Eliza Dushku bëri në profilin e saj në Facebook, fitoi me mijëra vizitorë, transmetojnë mediat shqiptare.

Një dokumentar me një mesazh të mrekullueshëm, një Elizë që merr pasaportën shqiptare në sy të të gjithë atyre që mund të mos kenë dëgjuar ndonjëherë për Shqipërinë.

Aktorja e famshme hollivudiane me origjinë shqiptare kishte vizituar vitin e kaluar trojet shqiptare, ku edhe ka realizuar xhirimet e dokumentarit në Shqiperi.

Eliza që ka lindur në SHBA, njihet për përmendjen e shpeshtë publik të faktit që në venat e saj rrjedh gjak shqiptari.

Dokumentari i Eliza Dushkut:

http://www.youtube.com/watch?feature=player_embedded&v=8iWgOykuwtI