Përfitimet nga pjesëmarrja në Kampionatin Evropian

Nga një përllogaritje e thjeshtë del se skuadra kampione e Evropës do të arkëtojë në total 34 milionë euro

(KEYSTONE/Jean-Christophe Bott)

Komiteti Ekzekutiv i UEFA ka vendosur që shuma që do t’u shpërndahet si bonuse Kombëtareve pjesëmarrëse në Kampionatin Evropian 2020 të jetë 371 milionë euro, një shumë kjo rreth 23% më e lartë se shifra që u shpërnda për 24 pjesëmarrësit e Evropianit të kaluar.

Çdo skuadër pjesëmarrëse në Evropian do të përfitojë automatikisht 9.25 milionë euro, përcjell albinfo.ch.

Gjatë fazës së grupeve, për çdo fitore shpërblimi do të jetë 1.5 milionë euro, ndërsa për barazimin 750 mijë euro.

Në fazën e 1/8-ave, skuadrat pjesëmarrëse do të marrin nga 2 milionë euro, ato që kalojnë në çerekfinale do të përfitojnë edhe 3.25 milionë euro të tjera, ndërsa për kualifikimin në gjysmëfinale shpërblimi shkon në 5 milionë euro.

Finalja e “Euro 2020” do të luhet në “Wembley” të Londrës dhe skuadra që do të ngrejë trofeun do të përfitojë një shpërblim prej 10 milionë eurosh, ndërsa ekipi finalist do të përfitojë shtatë milionë euro. Nga një përllogaritje e thjeshtë del se skuadra kampione e Evropës do të arkëtojë në total 34 milionë euro.

Komiteti Ekzekutiv i UEFA-s miratoi gjithashtu fondin prej 775 milionë eurosh për programin e zhvillimit të futbollit “Hattrick”, për periudhën 2020-2024.

Secila prej federatave anëtare të UEFA-s, do të sigurojë 14.1 milionë euro në 4 vitet e ardhshme nga ky program i UEFA-s.