“Gratë nga Srebrenica”, ekspozitë në Gjermani

40 gra, 40 rrëfime personale, 40 tragjedi të lidhura në varg, dhe me aq shumë dhembje saqë ajo mund të vërehet lehtë edhe me sy

40 fotografi bardh e zi janë të realizuara nga fotografit boshnjak Sead Husic, dhe secila prej të tyre  tregon nga një rrëfim personal.

Të gjitha janë të ekspozuar  në ekspozitën “Gratë nga Srebrenica” në  Cubus Kunsthalle të Duisburgut në Gjermani, transmeton Express

17 vjet kanë kaluar në ndërkohë nga masakra e Srebrenicës, në të cilën disa nga gratë e atjeshme humbën “vetëm”djemtë e burrat, disa “vetëm” vëllezërit e dajët, edhe pse shumica e tyre humbën krejt çka patën.

Për herë të parë 40 gra u portretizuan nga fotografi boshnjak Sead Husic. Me këtë ai dëshiron të kujton krimin më të madh në Evropë.

“Kjo është diçka e vështirë që të kuptohet. Mundohuni të paramendoni që përnjëherë të mbeteni pa krejt anëtarët meshkuj të familjes. Një grua këtu vërtet i ka humbur 70 anëtarë të familjes. Nuk e di se çka ishte më vështirë të dëgjoje; faktin që disa kishin humbur fëmijët – djemtë me moshë 9 ose 12-vjeçare – apo ato që i humbën burrat e vëllezërit. Mirëpo, ja që mua ‘m’u desh’ të dëgjoja, sepse përjetimet iu takonin vetëm atyre. Secila veç e veç, për vite të tëra…”, kujton autori i fotografive “Gratë nga Srebrenica”, Sead Husic.

Ekspozita mbetet e hapur deri më 15 korrik 2012.