Nuk ka dyfishim të mandatit të presidentit

Kmisioni i rekomandon parlamentit që të mos e shqyrtojë fare një propozim të tillë të bërë nga qeveria

Komisioni për politikë i Këshillit Nacional (Dhomës Nacionale të Parlamentit) ka votuar me shumicë kundër ndryshimit të sistemit të sotëm të qeverisjes në Zvicër. Me këtë, komisioni i përmendur ka hedhur poshtë kërkesën e Qeverisë (Këshillit Federal) që mandati i presidentit të federatës, nga një vit sa është tash, të zgjatet në dy vite.

Kështu, komisioni i rekomandon dhomës së përmendur te parlamentit që të mos e shqyrtojë fare propozimin e bërë nga qeveria.

Po ashtu janë hedhur poshtë edhe disa propozime të bëra nga mesi i vetë anëtarëve të komisionit për politikë. Mes tjerash, shumica në komision është shprehur kundër propozimit që qeveria të përbëhet nga 9 anëtarë ose ministra (nga 7 sa ka tash).

Me hedhjen poshtë të këtij ndryshimi, po rrezikohet edhe projekti i “Reformës së udhëheqjes së shtetit”, me të cilën po merren tash 10 vjet parlamenti dhe qeveria.