Së shpejti, Kosova marrëdhënie diplomatike me Lihtenshtajnin

Marrëdhëniet diplomatike ndërmjet dy vendeve, përmes akreditimit të ambasadorëve, do të vendosen në të ardhmen e afërt

Principata e Lihtenshtajnit dhe Republika e Kosovës janë pajtuar që të vendosin marrëdhëniet diplomatike ndërmjet dy shteteve, thuhet në një komunikatë shtypi të Ministrisë së Jashtme të Kosovës . “Pas kërkesës së Ambasadës së Republikës së Kosovës në Zvicër, Ambasada e Lihtenshtajnit në Bernë ka konfirmuar pajtueshmërinë e kësaj Principate për të vendosur marrëdhënie të drejtpërdrejta diplomatike me Republikën e Kosovës, duke u bazuar në Konventën e Vjenës mbi Marrëdhëniet Diplomatike, të 18 prillit 1961.Pas këtij pajtimi të ndërsjellë, marrëdhëniet diplomatike ndërmjet dy vendeve, përmes akreditimit të ambasadorëve, do të vendosen në të ardhmen e afërt”, bën të ditur komunikata.“Principata e Lihtenshtajnit e ka njohur shtetin e pavarur dhe sovran të Kosovës, më 25 mars 2008, duke qenë një ndër shtetet e para që e ka marrë një vendim të tillë. Në kuadër të aktiviteteve të vazhdueshme për forcimin e subjektivitetit ndërkombëtar të shtetit, Ministria e Punëve të Jashtme e Kosovës, ka intensifikuar përpjekjet për forcimin e marrëdhënieve dhe raporteve konkrete, me të gjitha shtetet që e kanë njohur pavarësinë e Kosovës.Për realizimin e këtij objektivi, MPJ ka iniciuar procesin e vendosjes së marrëdhënieve diplomatike me të gjitha shtetet të cilat e kanë njohur Republikën e Kosovës, qoftë përmes hapjes së misioneve të reja, por edhe përmes akreditimit në këto shtete, të ambasadorëve jorezidentë”, thuhet në fund të komunikatës.