Presidenti i klubit me revole në fushë

Raportohet se presidenti i PAOK-ut ka qarkulluar me pistoletë në brez, në dhomat e zhveshjes, çka ka tronditur futbollistët e AEK-ut, që kanë qëndruar të mbyllur për disa orë në dhomat e zhveshjes

Qyteti i Selanikut në Greqi bëhet sërish protagonist, teksa për të dytën herë brenda pak ditësh nuk arrin të përfundojë një ndeshje futbolli. Kjo ndodhi edhe mbrëmë.

Nën një atmosferë fantastike të krijuar nga tifozët e PAOK-ut, para dhe gjatë ndeshjes me AEK-un, rivalin direkt për titull, takimi u ndërpre pikërisht në minutën e 90-të, kur kishte mbetur për t’u diskutuar vetëm shtesa, përcjell albinfo.ch.

Ka mjaftuar një gol i vendasve në minutën e 90-të, që fillimisht u anulua dhe më pas u pranua nga gjyqtari, që situata të eskalojë dhe u bë e pamundur që të vijonte takimi.

Për këtë arsye të dy skuadrat u tërhoqën në dhomat e zhveshjes, teksa pavarësisht tentativave për të rifilluar, skuadra e AEK-ut refuzoi të dalë në fushë.

Raportohet se presidenti i PAOK-ut ka qarkulluar me pistoletë në brez, në dhomat e zhveshjes, çka ka tronditur futbollistët e AEK-ut, që kanë qëndruar të mbyllur për disa orë në dhomat e zhveshjes.

Ministri grek i sporteve ka dalë në një konferencë për shtyp shumë i alarmuar dhe ka thënë se vendi ka bërë shumë hapa mbrapa me këtë situatë dhe se do të komunikojë me UEFA-n, për të ndërprerë kampionatin.