Serbët, protestë kundër fundit të mbikëqyrjes

Shefi i Qarkut të Mitrovicës së veriut, Nedeljkoviç: Serbët u dërgojnë mesazh ndërkombëtarëve se nuk i duan institucionet e Kosovës

Disa qindra serbë nga komunat veriore të Kosovës, pore dhe në Graçanicë, kanë protestuar të martën kundër vendimit të Grupit Ndërkombëtar Drejtues për përfundimin e mbikëqyrjes së pavarësisë së Kosovës. Madje rrugët që lidhin Mitrovicën me Leposaviqin dhe me Zubin Potokun janë mbyllur për disa orë nga protestuesit.

Policia e Kosovës nga rajoni i Mitrovicës nëpërmjet një deklarate për media thotë se disa qindra serbë janë tubuar në pjesën veriore të Mitrovicës, me qëllim të bllokimit të rrugëve kryesore, në shenjë pakënaqësie kundër shtrirjes së institucioneve të Republikës së Kosovës në veri, si dhe ndaj vendimit për heqjen e mbikëqyrjes së pavarësisë.

Shefi i Qarkut të Mitrovicës së veriut, Radenko Nedelkoviç ka thënë se me këtë protestë, serbët në veri të Kosovës dëshironi të dërgoni një mesazh për komunitetin ndërkombëtarë se nuk i duan institucionet e Kosovës.

Po ashtu rreth 200 serbë kanë protestuar në mesditë edhe në qendër të komunës së re të Graçanicës e cila shtrihen në qendër të Kosovës, kundër fundit të mbikëqyrjes. Protesta është zhvilluar para objektit të komunës, ndërsa policia nuk ka raportuar për ndonjë incident. Madje rruga Prishtinë-Gjilan që kalon nëpër Graçanicë ka qenë e kalueshme gjatë gjithë kohës së protestës.

Një ditë më parë Grupi Drejtues Ndërkombëtar mori vendim për dhënien fund të mbikëqyrjes së pavarësisë. Ky grup i cili përbëhet nga të gjitha shtetet e BE-së që e kanë njohur Kosovën, SHBA-të dhe Turqia, kanë konsideruar se Kosova ka bërë hapa të mëdhenj në zhvillimin dhe konsolidimin e shtetit dhe se ka ardhur koha për përfundimin e mbikëqyrjes ndërkombëtare të pavarësisë.

Ky vendim u përshëndet nga të gjithë liderët e institucioneve të Kosovës dhe partitë politike, si dhe nga komuniteti ndërkombëtar.