Zvicerani ia “rrëmben” talentin Zvicrës për Kosovën

Idriz Voca (20) është talenti i radhës nga Zvicra, që i bashkangjitet përfaqësueses kosovare të futbollit. Ai po kalon momente shumë të mira në Luzern, shkruan “Blick”.

Edhepse nuk i ka bërë akoma dy javë, që kur mori udhëheqjen e përfaqësueses kosovare të futbollit, Bernard Challandes (66) rrëmbeu talentin e parë nga liga zvicerane. Idriz Voca luan si mesfushor dhe tani ka marrë ofertë për të luajtur me Kosovën kundër Madagaskarit dhe Burkina Fasos. 20 vjeçari me baba nga Kosova dhe nënë nga Bosnja, ka luajtur për Zvicër U20, ndërsa oferta ka pasur nga Shqipëria dhe Zvicra, përcjell albinfo.ch.

“Unë dua të luaj për vendlindjen time. Është një zgjedhje me zemër dhe më plotësohet një ëndërr,” tha ai, duke pranuar se gjasat për sukses janë më të mëdha në Kosovë, pasi në Zvicër ka shumë të rinj të talentuar. Në lidhje me Shqipërinë, Voca shton se atje vetëm ka qenë i ftuar për stërvitje dhe jo për diçka konkrete. Megjithatë “unë jam shqiptar i Kosovës,” përfundoi ai.