Zvicra ndihmon fshatrat e Ferizajt

Organizata zvicerane CDI ndihmon disa fshatra të Ferizajt për t’u furnizuar me ujë

Komuna e Ferizajt dhe organizata zvicerane CDI kanë nënshkruar një marrëveshje bashkëpunimi me të cilën disa nga fshatrat e komunës së Ferizajt do të përfshihen në rrjetin e Ujësjellësit. Sipas këtij memorandumi, fshatrat Sazli, Prelez i Muhaxherëve, Prelez i Jerlive dhe Papaz, do të bëhen me rrjet të ujësjellësit.

Marrëveshja është nënshkruar nga kryetari i Ferizajt, Agim Aliu, përfaqësuesi i CDI-së, Astrit Vokshi dhe drejtori i kompanisë rajonale të ujërave “Bifurkacioni” Faton Frangu. Siç raporton gazeta “express”, nënshkruesit e kësaj marrëveshjeve janë zotuar se për jetësimin sa më të shpejt të saj, duke zgjidhë më në fund problemin e mijëra qytetarëve të këtyre fshatrave.

“Vërtet këto marrëveshje janë shumë të rëndësishme për qytetarët ferizajas, për shkak se po u zgjidhet një problem jetik i tyre, problemi i furnizimit me ujë të pijshëm”, ka thënë kryetari Aliu, duke falënderuar CDI-në dhe Qeverinë Zvicerane për të gjitha projektet që ka realizuar në qytetin e Ferizajt, duke investuar miliona euro në projekte kapitale të ujit.

Përfaqësuesi i CDI-së, Astrit Vokshi, ndërkaq ka thënë se qeveria zvicerane gjithmonë është e gatshme që të ndihmojë komunën e Ferizajt, në projekte të cilat kanë të bëjnë me rrjetin e ujësjellësit. “Ne si CDI do të ndihmojmë edhe në realizmin e projekteve të tjera. Këtë e bëjmë në mënyrë se secili qytetarë të ketë ujë të pijshëm”, ka thënë Vokshi.