Shqipëria në mesin e vendeve më të lira në Evropë

Shqipëria renditet e dyta, pas Maqedonisë, për çmimet më të lira, në një nivel me Bullgarinë

Zyra e BE-së për statistikat “Eurostat”, thotë se kostoja e jetesës në Shqipëri është sa gjysma e nivelit mesatar të vendeve evropiane (51%), ndërkohë që me standardin e fuqisë blerëse, të ardhurat për person i ka vetëm sa 1/3 e mesatares së BE-së (31%).

E parafundit për nga varfëria, duke lënë pas vetëm Bosnjën, Shqipëria renditet e dyta, pas Maqedonisë, për çmimet më të lira, në një nivel me Bullgarinë. Zyra e BE-së për Statistikat ka publikuar indekset e nivelit të çmimeve për mallrat e konsumit dhe shërbimeve gjatë vitit 2011, tek vendet anëtare dhe ato që aspirojnë në BE.

Lista kryesohet nga Danimarka, si vendi më i shtrenjtë me 142%, ndërsa vendi më i lirë Maqedonia me 45%,  ku 100 % konsiderohet mesatarja e 27 vendeve të BE-së.

Treguesit më të ulët në Shqipëri vërehen për kategoritë “Hotele e Restorante” dhe “Alkool e Duhan”, respektivisht 42% dhe 50% të mesatares evropiane (BE27).

Buka, mishi, bulmeti, fruta-perimet e pijet jo-alkoolike, rezultojnë më të shtrenjta, pasi indeksi i çmimeve në vend është 70% e mesatares evropiane, për veshjet 72%, për biçikleta e automjete personale 98%, ndërsa pajisjet elektronike 108%, pra mbi çmimet mesatare në BE-së.