UP-ja shpall konkursin, pranohen 9221 studentë

Do të pranohen 323 studentë nga Shqipëria, Maqedonia, Mali i Zi dhe Presheva e Bujanoci, si dhe 294 nga minoritetet

Universiteti i Prishtinës (UP) ka shpallur sot konkursin për regjistrimin e studentëve të rinj për vitin akademik 2012-2013.

Sipas një njoftimi që ka bërë universiteti më i madh i vendit, këtë vit do të regjistrohen 9221 studentë, prej të cilëve 8011 të rregullt dhe 1210 me korrespondencë.

Sipas këtij njoftimi UP-ja do të regjistrojë edhe 323 studentë të rregullt nga Shqipëria, Maqedonia, Mali i Zi dhe Presheva e Bujanoci, si dhe 294 studentë nga minoritetet.

Të drejtë pranimi në UP kanë të gjithë kandidatët të cilët e kanë përfunduar me sukses shkollën e mesme në Kosovë dhe e kanë diplomën për shkollimin e kryer.

Në universitet mund të pranohen edhe studentët nga shtetet e tjera, në bazë të kuotave të përcaktuara nga Ministria e Arsimit.

Kandidatët jokosovarë dhe minoritarë kanë të drejtë të konkurrojnë dhe të pranohen vetëm në kuotat e parapara për ta.

Kandidatë jokosovarë konsiderohen ata kandidatë që e kanë mbaruar shkollimin e mesëm jashtë Kosovës dhe me rastin e paraqitjes në konkurs, duhet t’i kenë të nostrifikuara dokumentet e shkollimit.

Secili kandidat mund të konkurrojë vetëm në një fakultet, departament apo drejtim.

Kandidatët që refuzohen mund t’i paraqesin ankesë Këshillit të Fakultetit, të njëjtën ditë kur janë njoftuar për rezultatet e provimit pranues.