Minatorët e “Trepçës” hyjnë në ditën e dytë të grevës

Minatorëve të flotacionit në Stantërg, sot u janë bashkuar edhe ata të minierave të Kishnicës dhe Artanës

Greva e minatorëve të “Trepçës” ka hyrë në ditën e dytë, ndërsa minatorëve të flotacionit në Stantërg, sot u janë bashkuar edhe ata të minierave të Kishnicës dhe Artanës. Ata po kërkojnë anulimin e emërimit të drejtorit të përkohshëm nga ana e Agjencisë për Privatizim (AKP), e cila ligjërisht është titullare e resurseve të “Trepçës”.

Ata janë duke pritur përmbushjen e kërkesave të tyre, ndërsa Sindikata e Pavarur e Minatorëve pas takimit urgjent dhe shqyrtimit të gjendjes më të re të krijuar në ndërmarrje, ka dalë me vendim se minatorët nuk e njohin vendimin e AKP-së për emërimin e Eset Ujkanit si ushtrues të detyrës së menaxherit të “Trepçës”.

Minatorët kanë propozuar tre emra tjerë që sipas tyre e njohin punën e minierave: drejtorin e Departamentit për Miniera dhe Zhvillim, Halil Qela, drejtorin e flotacionit në Tunelin e Parë, Miftar Hyseni dhe drejtorin në minierën e Stantergut, Beqir Maliqi.