Arbën Xhaferi në gjendje kome

Neurokirurgu kujdestar Vlladimir Mirçevski ka thënë se gjendja shëndetësore e Xhaferit është e rëndë

Ish-kryetari i Partisë Demokratike Shqiptare (PDSH), Arbën Xhaferi është në gjendje të rëndë shëndetësore, pas një hemorragjie cerebrale (gjakderdhje në tru), në mesnatën e mërkurës. Ai po qëndron në gjendje kome në Spitalin Neurokirurgjik të Shkupit, ndërsa mjekët specialistë po bëjnë përpjekje për t’ia shpëtuar jetën.

Xhaferi, i cili është konsideruar si njëri nga intelektualët më të mëdhenj të kësaj plejade, është gjetur në gjendje kome në banesën e tij në Tetovë. Siç raporton agjencia INA, ai menjëherë është dërguar në Spitalin Klinik të Shkupit ku i janë vendosur aparate për frymëmarrje.

Neurokirurgu kujdestar Vlladimir Mirçevski ka thënë se gjendja shëndetësore e Xhaferit është e rëndë.

‘Mbrëmë rreth orës 21, në Klinikën për neurokirurgji, është pranuar Arbwn Xhaferi, si pasojë e humbjes së vetëdijes dhe humbjes së ndjenjave. Pacientit i është dhënë terapia, për momentin gjendja e tij është e rëndë, por relativisht e qëndrueshme. Janë marrë të gjitha masat dhe kurimi është në vazhdë e sipër’, ka thënë mjeku.

Arbën Xhafëri ka një kohë që vuante nga sëmundja Parkinson, e cila edhe ndikoi që ai të tërhiqet nga jeta e përditshme politike. Dy dekada më parë, ai formoi PDSH-në, njërën ndër partitë më të fuqishme shqiptare në Maqedoni, të cilën e drejtoi deri në vitin 2007.

Në vitin 2001, Xhaferi si përfaqësues i shqiptarë ishte negociator dhe nënshkrues i Marrëveshjes së Ohrit, e cila i dha fund konfliktit shqiptaro-maqedonas në Maqedoni. Ai ka lindur më 24 janar të vitit 1948 në qytetin e Tetovës.