Bie interesimi i serbëve për BE

Nëse aktualisht do të mbahej një referendum për integrim e Serbisë në BE, më pak se gjysma e serbëve do të votonin pro

Më pak se gjysma e qytetarëve të Serbisë janë të interesuar për integrim në Bashkimin Evropian, ndërsa më shumë se gjysma, ose shprehen kundër, ose abstenojnë sa i përket anëtarësimit në bashkësinë më të madhe ekonomike dhe politike të shteteve evropiane. Në një hulumtim që është realizuar nga Zyra për BE e Qeverisë së Serbisë, ku janë anketuar rreth 1000 respodentë, shifrat tregojnë një rënie nën 50 për qind të serbëve për integrim në BE. “Nëse referendumi për pranim në BE do të mbahej tash, 49 për qind e votuesve do të thonë “po”, integrimin, 25 për qind e tyre të ishin kundër, ndërsa 19 për qind do të abstenonin”, thuhet në anketë të cilën e raporton REL. Sipas këtij hulumtimi, 8 për qind e të anketuarve ende nuk e dinë se si të votojnë. Serbia ka fituar të drejtën e shtetit kandidat për në BE, por akoma nuk është caktuar data për fillimin e negociatave. Kushti themelor për këtë, vazhdon të mbetet Kosova, respektivisht përmirësimi i raporteve ndërfqinjësore, implementimi i marrëveshjeve dhe vazhdimi i dialogut. Ndryshe, në një anketë tjetër e të njëjtit nivel, por që është zhvilluar në Kosovë, kanë dalë se kosovarët e mbështesin mbi 70 për qind anëtarësimin në BE.