Kush është Meritan Shabani, futbollisti që debutoi për Bayernin

Ai ka prejardhje nga Kosova, dhe është rritur në akademinë e Bayernit, derisa më në fund kishte rastin të debutonte në Bundesliga

Çdo ditë e më shumë futbollistë shqiptarë po luajnë në skuadra të mëdha evropiane.

Njëri ndër ta është dhe Meritan Shabani. 19-vjeçari nga Kosova, i cili është pjesë e moshave të Bayernit, ishte thirrur në ekipin e parë nga trajneri Jup Heynkess për ndeshjen ndaj Entrachtit të Frankfurtit, përcjell albinfo.ch.

Trajneri i bavarezve i befasoi të gjithë, teksa vendosi ta hedhë talentin shqiptar në formacionin titullar.

Shabani qëndroi në fushën e lojës për 56 minuta, duke bërë një paraqitje të kënaqshme, ndërsa më pas u zëvendësua nga mesfushori Thiago Alcantara.

Shabani nuk ka luajtur për asnjë kombëtare deri më tani, dhe ka mundësinë e zgjedhjes për të ardhmen. Ai ka prejardhje nga Kosova, dhe është rritur në akademinë e Bayernit, derisa më në fund kishte rastin të debutonte në Bundesliga.

Bayerni triumfoi me rezultat 4:1, edhe pse e ka siguruar më parë titullin kampion.