Konfuzion me njohjet e Kosovës

Në opinion është krijuar paqartësi nëse Republika e Malit e ka njohur apo jo, Republikën e Kosovës

Njohja e Republikës së Kosovës nga shtetet afrikane vazhdojnë të krijojnë konfuzion në Prishtinë, nëse njohjet janë të vërteta apo jo. Disa nga këto njohje që i ka prezantuar zëvendëskryeministri Behjget Pacolli, madje duke publikuar edhe “letrat kredenciale”, së fundit kanë krijuar një “mjegull” për vërtetësinë e tyre. 

Pas shteteve si Nigeri e Uganda të cilat asnjëherë nuk e kanë vërtetuar njohjen në MPJ, është Republika e Malit që së fundit ka krijuar paqartësi, nëse njohja është reale apo e trilluar. 

Në mediet e Kosovës është cituar një deklaratë e Global Times e cila i referohet burimeve në Mali, të cilat kanë mohuar njohjen e Kosovës. Madje thuhet se Presidenca në mënyrë kategorike e mohoj këtë lajm fals, i cili tenton ta shkatërroj imazhin e Malit. 

“Presidenca e Malit dëshiron të informojë gjithë komunitetin kombëtar dhe ndërkombëtar se presidenti nuk ka nënshkruar ende ndonjë dokument që njeh Republikën e Kosovës dhe rezervon të drejtën për të marrë masat e duhura për të identifikuar dhe ndëshkuar autorët e dokumentit të rreme”, shkruan në deklaratë. 

Një javë më parë, ndërkaq zëvendëskryeministri Begjet Pacolli në një konferencë për media e prezantoi njohjen e Kosovës nga Mali të nënshkruar nga presidenti Dioncounda Traore. 

Ndërsa këshilltari për media i Pacollit, Jetlir Zyberaj vazhdon të këmbëngulë se njohja nga Mali është zyrtare. 

Ai tha se pas raportimeve nëpër media lidhur me paqartësitë e krijuara rreth njohjes nga Republika e Malit, zëvendëskryeministri Pacolli, i cili ndodhët në turne lobimi në kontinentin e Afrikës, do të udhëtojë përsëri në Mali për tu takuar autoritetet shtetërore atje dhe për të sqaruar konfuzionin e krijuar. 

“Nota verbale e njohjes ka arritur javën e kaluar, e vulosur dhe e nënshkruar nga presidenti i Republikës së Malit. Ashtu siç është pranuar, nota verbal është prezantuar para opinionit publik dhe është dërguar në MPJ”, deklaron Zyberaj. Si rezultat i këtij konfuzioni të shkaktuar Pacolli i cili ndodhet në rajon, sipas tij, do të vizitojë presidencën e Malit dhe Qeverinë në Burkina Faso.