Dërgohet njësi speciale gjermane në Kosovë

Për shkak të tensioneve të vazhdueshme ushtria gjermane dërgon sërish një njësi speciale në Kosovë

Gjermanët do të zëvendësojnë në fillim të tetorit një batalion italian.

Forca e përbashkët gjermano-austriake e cila njihet ndryshe edhe si Trupa Operative Rezervë (ORF), në përbërje të së cilës janë rreth 700 ushtarë është kërkuar nga forca paqeruajtëse ndërkombëtare KFOR e cila drejtohet nga NATO. Kështu ka njoftuar komanda e operacioneve të Bundeswehrit në Potsdam.

Njësia do të zëvendësojë në fillim të tetorit një batalion italian i cili sipas planit përfundon misionin e tij.

Sipas një raporti të revistës gjermane “Der Spiegel”, kjo është hera e tretë gjatë këtij viti që ushtarët gjermanë dhe austriakë nisen në drejtim të Kosovës, transmeton DW.

Qeveria gjermane kishte rënë dakord për të “mbështetur sa më mirë që të jetë e mundshme vazhdimin me sukses të operacionit dhe një stabilizim të mëtejshëm dhe përmirësimin e gjendjes së sigurisë në veri të Kosovës”, citon gazeta nga një letër që Komanda e Operacioneve të Bundeswehrit i ka drejtuar anëtarëve të zgjedhur të Bundestagut.