Limaj: Nikoliq të kërkojë falje për krimet në Kosovë

Limaj tha se me Nikoliqin dhe Daçiqin mund të bisedohet vetëm atëherë kur ata kërkojnë falje për krimet e bëra në Kosovë

Nënkryetari i partisë Demokratike të Kosovës, Fatmir Limaj edhe një herë reagoi kundër bisedimeve me Serbinë për çështje politike. Ai tha se për këtë lloj dialogu duhet një konsensus i brendshëm, fillimisht brenda partive e më pas edhe gjithë institucional për të vendosur bashkërisht nëse duhet apo jo të negociohet me ish-trashëgimtarin e Millosheviqit.

Nënkryetari i PDK-së dhe njëri nga ish udhëheqësit më të dalluar të UÇK-së, Limaj thotë se pa pasur një qëndrim unik nuk mund të huhet në bisedohet me Serbinë. Në një intervistë për “Zëri” Limaj tha se për fatin e Kosovës nuk mund të vendosë as PDK-ja e as AAK-ja dhe askush tjetër.

“Padron i këtij vendi është populli i Kosovës. Dhe nëse mendoni se ju që keni qenë UÇK edhe mund të bëni çfarë të doni me Kosovën, gaboni rëndë. Kosova është

pak më e madhe, pak më ndryshe”, shprehet Limaj, i cili në zgjedhjet e fundit ka qenë personi i dytë më i votuar në Kosovë pas kryeministri Hashim Thaçi.

Ai thotë se me presidentin e Serbisë Tomisllav Nikoliqi dhe kryeministri Ivica Daçiq mund të bisedohet vetëm atëherë kur ata kërkojnë falje për krimet e bëra dhe i shuajnë të gjitha institucionet serbe nga territori i Kosovës. “Nikoliqi e Daçiqi po veprojnë si në kohën e Millosheviqit”, tha Limaj, ish komandant “Çeliku”.

Ai po ashtu në këtë intervistë, e cila është e para prej që ai është liruar nga gjykata e EULEX-it për krime lufte, flet edhe për koalicionin e përfolur me AAK-në. Për këtë çështje ai tha se asnjëherë nuk është biseduar në partinë e tij-PDK. “Për ndryshimin e koalicionit deri më tani asnjëherë nuk është diskutuar në Kryesinë e partisë”, tha Limaj.

Ndërsa sa i përket çështjes së veriut, Limaj thotë se maksimumi i mundshëm që ka bërë Prishtina deri më tani, ka qenë Pakoja e Ahtisarit, “Ky është kompromisi më i dhimbshëm që ka bërë Kosova”, u shpreh nënkryetar i partisë më të madhe parlamentare në Kosovë.