LDK tërhiqet nga reforma zgjedhore

Vendimin e partisë më të fuqishme opozitare e ka konfirmuar kryetari i Komisioni, Haki Demolli, deputet i LDK-së

E indinjuar me mosrespektimin e marrëveshjes së liderëve (Thaçi, Pacolli, Mustafa) për presidenten Atifete Jahjaga, Lidhja Demokratike e Kosovës është tërhequr nga Komisioni për Reformën Zgjedhore. Vendimin e partisë më të fuqishme opozitare e ka konfirmuar kryetari i Komisioni, Haki Demolli, deputet i LDK-së.

“Sot kemi mbajtur takimin e fundit të Komisionit për Reformën Zgjedhore dhe ne dy përfaqësuesit e LDK-së, duke e pasur parasysh mos respektimin e marrëveshjes tri palëshe, tërhiqemi nga Komisioni deri në momentin kur kjo marrëveshje të zbatohet”, ka thënë Demolli.

Sipas marrëveshjes së liderëve, Thaçi, Pacolli dhe Mustafa, me prezencën dhe të ish-ambasadorit amerikan në Prishtinë, Chrisopher Dell, Atifete Jahjaga duhet të qëndroj në krye të shtetit derisa të përfundojë reforma zgjedhore e kushtetuese, dhe shteti të shkojë në zgjedhje të drejtpërdrejta nga populli.

Mirëpo presidentja nuk e respektoi marrëveshjen, pavarësisht që ajo u ratifikua në kuvend, dhe kërkoi mendimin e Gjykatës Kushtetuese. Kjo e fundit tha se Jahjaga ka mandat të  plotë.

Vendimi i Gjykatës u pranua plotësisht nga kryeministri Hashim Thaçi,  ndërsa u kundërshtua nga kryetari i LDK-së, Isa Mustafa, kurse Behgjet Pacolli i AKR-së,  abstenoi.

LDK e pakënaqur me këtë qëndrim, kërcënoi me bojkot të reformës zgjedhore dhe sot e bëri këtë.