Dështon miqësorja Shqipëri-Kosovë në Zvicër

Kjo ndeshje ishte planifikuar të zhvillohet më 29 maj në Zvicër

Edhe pse kishte një marrëveshje mes Federatës Shqiptare të Futbollit dhe asaj të Kosovës për një miqësore në tokë neutrale, duket se ndeshja e programuar këtë vit do të dështojë.

Federata zvicerane duhej të siguronte lejen për ndeshjen mes kuqezinjve dhe përfaqësueses kosovare, por helvetikët nuk pranojnë me pretendimin se cenon sigurinë, përcjell albinfo.ch.

Kryetari i FFK-së, Fadil Vokrri në një intervistë për “Kosova Press” thotë se nuk kanë marrë ende lejen: “Po, afër anulimit është, sepse Federata e Futbollit Zviceran nuk e ka dhënë lejen. Duhet tashmë vetëm njoftimi zyrtar për anulimin e miqësores që ishte programuar në fund të këtij muaji. Edhe opsionet për zhvendosjen e miqësores në një stadium tjetër, po bien nga dita në ditë”, u shpreh Vokrri.

Kjo ndeshje ishte planifikuar të zhvillohet më 29 maj në Zvicër.

Lajmi është konfirmuar për Top Channel edhe nga presidenti i FSHS-së, Armand Duka. “Po, është e vërtetë ajo që ka deklaruar presidenti Vokrri dhe ne jemi duke kërkuar mundësi të tjera për të shfrytëzuar këtë periudhë sa më mirë për ekipin dhe trajnerin”, deklaroi presidenti Duka.

Nga burime jo zyrtare ndërkohë mësohet se një alternativë mund të jetë përballja me Austrinë, duke qenë se e ka këtë datë e ka lirë.