Bie numri i nxënësve në Maqedoni

Sipas një raporti që ka publikuar Ministra e Arsimit, rreth 800 nxënës sivjet janë regjistruar më pak se sa vitin e kaluar në Maqedoni

Statistikat e përgjithshme në Maqedoni tregojnë se për çdo vit në këtë shtet ka ulje të numrit të nxënësve që regjistrohen në kasën e parë. Sipas një raporti të Ministrisë së Arsimit të cilin e publikon agjencia INA, rreth 800 nxënës sivjet janë regjistruar më pak se sa vitin e kaluar.

Përkundër fushatave të shumta të udhëhequra nga Ministria e Arsimit dhe Shkencës (MASH) për përfshirjen e të gjithë të rinjve në arsim, numri i nxënësve që u regjistruan për herë të parë në klasën e parë është ulur dukshëm.

“Në vitin shkollor 2012/2013, rreth 200 mijë nxënës ndjekin mësimin në shkollat fillore në Maqedoni, prej të cilëve këtë vit janë regjistruar 20 mijë e 700 filloristë, 780 më pak në krahasim me vitin paraprak, ku ishin regjistruar 21 mijë e 480 nxënës. E njëjta ka ndodhur edhe në fillim të vitit shkollor 2011/2012 ku në shkollat fillore janë evidentuar 198.856 nxënës, që ishte më pak për 2,7 për qind në krahasim me 2010/2011”,thuhet në raport.

Sipas të dhënave statistikore, të cilat i publikon INA, në dhjetë vitet e fundit në shkollat e vendit numri i nxënësve është ulur për 40 mijë nxënës. Kjo rënie, siç thuhet, është e pranishme kryesisht në shkollat ky mësojnë maqedonasit, ndërsa në shkollat shqiptare nuk vërehet kjo rënie. Shqiptarët, siç thuhet më tej,  gjithnjë e më tepër po bëhen faktor dominues numerik nëpër shkolla.