Qendrat Kulturore për Diasporën, e bëjnë sefte në Turqi

Makolli: Qendrat në Turqi do të jetë ndihmesë e madhe për shqiptarët, të cilët jetojnë atje që ta ndiejnë sa më afër vendlindjen e tyre

Qendra kulturore për diasporën kosovare po bëhen realitet në Turqi.

Qeveria e Republikës së Kosovës dhe Qeveria e Republikës së Turqisë nënshkruan të premten marrëveshjen për hapjen e Qendrave Kulturore të Kosovës për Diasporën në Turqi, si dhe ato turke në Republikën e Kosovës.

Ministri i Diasporës, Ibrahim Makolli, dhe ambasadorja turke në Kosovë Songul Ozan, e kanë vlerësuar rëndësinë e hapjes së këtyre qendrave, pasi që Turqia para disa kohësh e ka bërë një gjë e tillë në Kosovë.

Ministria kosovar i diasporës ka thënë se themelimi i këtyre qendrave në Turqi do të jetë ndihmesë e madhe për shqiptarët të cilët jetojnë atje që ta ndiejnë sa më afër vendlindjen e tyre.

Sipas Makollit këto qendra kulturore, ashtu edhe siç shihet me Ligjin për Diasporën, hapen në vendet ku jetojnë dhe veprojnë mërgimtarët tanë dhe shërbejnë për zhvillimin e tyre në fushat kulturore, arsimore etj.

„Ne, në Turqi kemi një mërgatë relativisht të madhe në numër dhe me këtë po i ofrojmë mundësinë më të madhe për njohjen e kulturës së vendit të origjinës dhe ruajtjes së identitetit. Gjatë muajve në vijim Ministria e Diasporës do të inicioj marrëveshje të tilla edhe me shtetet e tjera ku jeton dhe vepron mërgata jonë, në funksion të ruajtjes dhe të kultivimit të identitetit kombëtar, gjuhësor, kulturor e arsimor të mërgimtarëve, si dhe forcimit të lidhjeve të tyre me institucionet e Republikës së Kosovës“, ka thënë Makolli

Pas Turqisë radhën e ka Zvicra, kështu të paktën ka premtuar Ministri i Diasporës, Ibrahim Makolli.