Japonia ndihmon filarmoninë kosovare

Qeveria e Japonisë ka dhënë një donacion prej gjysmë milioni eurosh për Orkestrën Filarmonike të Kosovës

Zëvendësministri kosovar i Punëve të Jashtme, Petrit Selimi ka pranuar të mërkurën një donacion nga Agjencia për Bashkëpunim Ndërkombëtar e Japonisë (JICA) në vlerë 500 mijë euro, e cila i dedikohet Orkestrës Filarmonike të Kosovës. Garanti japonez parashikon pajisjen me vegla muzikore të modeleve të fundit.   

Përmes këtij granti në vlerë prej 569 mijë euro, Japonia siç thuhet, ofron mbështetje shumë të rëndësishme për Orkestrën Filarmonike të Kosovës.

“Ky është një hap i vogël në maratonën tonë shumë të gjatë  të miqësisë ndërmjet dy shteteve”, tha zëvendësministri Selimi, sipas të cilit, ndihma për filarmoninë ka rëndi të jashtëzakonshme për kulturën kosovare.

Ndërkaq shefi i JICA-s për Ballkan, Ken Yamada premtoi përkrahje edhe në të ardhmen për Kosovën, duke theksuar se projekti në fjalë duhet të jetë shembull i bashkëpunimit dhe përpjekjes që përmes muzikës të tejkalohen kufijtë dhe të ndërtohen ura të komunikimit ndërmjet popujve.

“Japonia dhe JICA do të jenë këtu për Kosovën dhe do t’i shqyrtojnë mundësitë për bashkëpunim të mëtutjeshëm”, tha Yamada.