Produktet “Made in Kosova” promovohen në SHBA

Sipas një njoftimi të MTI-së, do të jenë mbi 50 biznese nga Kosova që do të promovojnë produkteve vendore në SHBA

Disa nga kompanitë më të fuqishme kosovare, si “Stone Castle”, “Ftutex”, “AskFood” etj, nga data 20 deri më 27 shtator, do t’i promovojnë produktet e tyre në Nju Jork dhe Uashington të Shteteve të Bashkuar të Amerikës (SHBA). Ky promovim i produkteve “Made in Kosova” mundësohet nga Agjencia për Promovimin e Investimeve në Kosovë (APIK), e cila vepron në kuadër të Ministrisë së Tregtisë dhe Industrisë (MTI).

Po ashtu APIK vepron edhe në bashkëpunim me Odën Ekonomike Amerikane, Ambasadën e Kosovës në Uashington, si dhe Ministrinë e Diasporës.

Delegacionit i afaristëve kosovarë në SHBA do të udhëhiqet nga zëvendëskryeministrja Mimoza Kusari – Lila, ndërsa sipas një njoftimi të MTI-së, do të jenë mbi 50 biznese nga Kosova që do të promovojnë produkteve vendore në SHBA. Në kuadër të këtij misioni, siç thuhet në njoftim, do të ketë takime B2B (biznesmen me biznesmen) në Uashington dhe Nju Jork.

“Me datën 24 shtator do të organizohet Konferenca për promovimin të bashkëpunimit dhe investimeve në Uashington. Gjatë qëndrimit të tyre atje, nën udhëheqjen e zëvendëskryeministres Kusari – Lila, delegacioni do të vizitojë disa kompani amerikane”, thuhet në njoftim.

Kosova, ndërkaq e gëzon të drejtën e preferencave tregtare me SHBA (GSP), e cila sipas MTI-së, nënkupton eksport të produkteve kosovare pa taksë doganore. “Këto janë vetëm disa fakte që tregojnë që Shtetet e Bashkuara të Amerikës ofrojnë një potencial të mirë të bashkëpunimit me bizneset kosovare”, thuhet në njoftim.

Ndryshe nga eksportet, në Kosovë gjatë vitit 2011 kanë qenë 14.3 milionë euro investime të huaja direkte nga SHBA-të, ndërsa në kuartalin e parë të këtij viti investimet e huaja, sipas MTI-së, kanë shënuar vlerën 2.4 milionë euro.