Haradinaj e Kurti përplasen në Kuvend

“Një qeveri e tillë me një kryeministër kaq të dobët, s’mund ta bashkojë Mitrovicën. Ky nuk është kryeministër, tjetër kush është kryeministër. Ky është korrier i presidentit”, ka thënë Kurti

Kryeministri Ramush Haradinaj i ka lutur partitë parlamentare që të bëhen pjesë e fazës së fundit të dialogut me Serbinë.  Sa i përket platformës së Qeverisë për dialogun, sipas së cilës presidentit i është lënë të udhëheqë dialogun, kryeministri u arsyetua duke thënë se në marrëveshjet e arritura deri tani nuk ka qenë ai i përfshirë.

Në interpelancën për ndarjen e mjeteve financiare në shumën prej një milion euro për KOSTT-in, për mbulimin e shpenzimeve të furnizimit me energji elektrike të katër komunave në veri të Kosovës, kryeministri ka thënë se nuk duhet qëndruar askush jashtë këtij procesi.

Haradinaj tha se të gjitha konstatimet për gjendjen në energji janë të sakta, porse ato nuk janë të tetë muajve të fundit, por të 18 vjetëve të fundit. Haradinaj tha se pala serbe e ka keqpërdorur këtë temë dhe po vazhdon të tolerohet nga Brukseli. Ai shtoi se vendimin për ndarjen e 1 milionëve e ka bërë me vetëdije, por jo për të përkrahur sekserët dhe përfituesit, por për të vendosur rregull dhe për ta shtrirë autoritetin në Veri në tregun energjetik.

Deputetja e Alternativës, Mimoza Kusari-Lila, ka folur në emër të LDK-së, duke thënë se autoriteti i Kosovës në Veri nuk menaxhon me asetet e veta. Kjo temë ka përplasur kryeministrin e liderin e Vetëvendosjes.  Kurti  tha se Haradinaj është  në pozitë të dobët, madje tha se Haradinaj është detyruar ta votojë demarkacionin vetëm për të qëndruar në postin të cilin sot e ka.

“Një qeveri e tillë me një kryeministër kaq të dobët, s’mund ta bashkojë Mitrovicën. Ky nuk është kryeministër, tjetër kush është kryeministër. Ky është korrier i presidentit”, ka thënë Kurti. Ndërsa Haradinaj kritikat e Kurtit i ka konsideruar të dobëta.