Në bibliotekën e fëmijëve në Rozzano u organizua një aktivitet i veçantë leximi, ku fëmijët dëgjuan historinë e Pinokut në anglisht, shqip dhe frëngjisht, duke promovuar shumëgjuhësinë dhe ruajtjen e gjuhës amtare, shkruan albinfo.ch.
Biblioteka Shqipe në Diasporë – Rozzano, Milano, është bërë pjesë e një aktiviteti kulturor dhe edukativ për fëmijët, në kuadër të projektit “Mamma Lingua e il Passaporto delle Storie”. Aktiviteti iu kushtua veprës së njohur “Pinoku”, me rastin e 200-vjetorit të lindjes së autorit të saj, Carlo Collodi, i lindur më 24 nëntor 1826 në Firence, raporton albinfo.ch.
Gjatë aktivitetit, fëmijët dëgjuan historinë e kukullës së famshme fillimisht në anglisht, më pas në shqip dhe në fund në frëngjisht. Përmes këtij udhëtimi gjuhësor, ata patën mundësinë ta përjetojnë të njëjtën histori në tri gjuhë të ndryshme.
Në përfundim, pjesëmarrësit krijuan me duart e tyre kukullën e Pinokut, duke e shndërruar aktivitetin e leximit edhe në një përvojë krijuese.
Me këtë rast, organizatorët falënderuan shoqatën “Il Nido delle Aquile” për dhurimin e një numri të konsiderueshëm librash në gjuhën shqipe për bibliotekën.
Aktiviteti vuri në pah rëndësinë e leximit, shumëgjuhësisë dhe ruajtjes së gjuhës amtare te fëmijët që rriten në diasporë./Albinfo.ch
