Dy serbë arrestohen për krime lufte

Dy të dyshuarit, sipas EULEX-it, janë duke u hetuar mbi supozimet se kanë kryer krime lufte të dhunimit në prill 1999 në Kosovë

Gjatë një aksioni të përbashkët të Policisë së EULEX-it dhe Policisë së Kosovës, në rajonin e Vushtrrisë, janë arrestuar dy qytetarë serbë nën akuzën për krime të luftës.

Dy të dyshuarit, sipas një kumtese lëshuar nga misioni i BE-së për sundim të ligjit, (EULEX)  janë duke u hetuar mbi supozimet se kanë kryer krime lufte të dhunimit në prill 1999 në Kosovë.“Operacioni i përbashkët, i kryer nga Njësia për Hetimin e Krimeve të Luftës (NJHKL) e Policisë së EULEX-it dhe Njësia për Hetimin e Krimeve të Luftës e Policisë së Kosovës (NJHKLPK), është realizuar në Baimoc (Babin Most) dhe Vushtrri. Mbështetjen operative e kanë ofruar Njësia Speciale e Policisë së Kosovës dhe Njësia Forenzike e Policisë së Kosovës”, thuhet në kumtesë.Të dyshuarit u arrestuan me urdhër të gjykatës, ndërsa është bërë edhe bastisja e shtëpive të tyre. “Rasti është duke u hetuar nga Prokuroria Speciale e Kosovës (PSRK)|, thuhet në kumtesën e lëshuar nga EULEX.Ndryshe, sipas burimeve të “albinfo.ch” në Babimofc është arrestuar 72-vjeçari, Gjorgje Bojkoviq, ndërsa në Prilluzhë, Jovica Dejanoviq, 52-vjeç. Ky i fundit ka disa vite që punon si polic në Policinë e Kosovës. Arrestimi i tyre është bërë në orët e hershme të ditës së enjte.