Kuvendi kalon Rezolutën për bisedime me Serbinë

Miratimin e kësaj rezolute kanë votuar 68 deputetë, 3 votuan kundër, ndërsa 4 abstenuan. Rezoluta ngjalli debat të ashpër në Kuvend

Deputetët e Kuvendit të Kosovës me shumicë votash e kanë miratuar rezolutën e Partisë Demokratike të Kosovës (PDK), për normalizimin e raporteve me shtetin fqinj, Serbinë.

Për miratimin e kësaj rezolute, e cila ngjallë reagime në Kuvend, kanë votuar 68 deputetë, tri vota u regjistruan kundër, ndërsa katër ligjvënës abstenuan.Përfaqësues e Qeverisë së Kosovës thanë se normalizimi i raporteve me Serbinë, është njëri nga kushtet themelore për integrimin e Kosovës në strukturat euroatlantike.

Rezoluta , ndërkaq i jep të drejt qeverisë së Kosovës që të zhvilloj negociata me Serbinë.

“Me Serbinë nuk do të bisedohet për çështjet e brendshme apo për status special për veriun”, deklaruan ata.

Para se të nisë seanca plenare e Kuvendit të Kosovës, objekti i Legjislativit ka qenë i rrethuar nga njësitet speciale të Policisë së Kosovës.

Ky veprim i ministrit të Rendit, Bajram Rexhepi ka irrituar kryetarin e Kuvendit, Jakup Krasniqin, i cili ka kërkuar që menjëherë të hiqen policia, sepse vendi nuk është shtet policor, për demokratik.Krasniqi ka ndërprerë punimet e seancës plenare, deri në kohen kur Policia e Kosovës ka lëshuar objektin e Kuvendit të Kosovës.

Policia me urdhër të ministrit Rexhepi ishte dislokuar në afërsi të Kuvendit nga frika se aktivistët e Vetëvendosjes mund të protestojnë në kohën kur rezoluta e PDK-së pritet të miratohet.Vetëvendosje e konsideron tradhti kombëtare rezolutën PDK-së të mbështetur edhe nga Aleanca për Ardhmërinë e Kosovës e Ramush Haradinajt.

Duke shprehur pakënaqësinë kundër kësaj rezolutë e me theks të veçantë kundër bisedimeve politike me Beogradin, dy ligjvënësit e Vetëvendosjes, Visar Ymeri dhe Liburn Aliu, mbajtën lart një pankartë me mbishkrimin “Rezoluta e nënshtrimit ndaj Serbisë”.