Ashton ia arriti qëllimit: Bashkoi Thaçin e Daçiqin

Chaterine Ashton ka “pajtuar” Thaçin e Daçiqin.Dy kryeministrat ia kanë shtrënguar dorën njëri-tjetrit

Dy politikanët me ngarkesë më të madhe urrejtjeje në Ballkan, kryeministri i Kosovës, Hashim Thaçi dhe ai i Serbisë, Ivica Daçiq ia kanë shtrënguar dorën njëri-tjetrit në një takim në Bruksel. Dy kryeministrat janë takuar pas një iniciative të përfaqësueses së Bashkimit Evropian për Politikë të Jashtme, Chaterine Ashton 

Kjo e fundit kishte ftuar në Bruksel dy kryeministrat, me qëllim që t’i ofrojë Prishtinë dhe Beogradin për nisjen e një vale të re të negociatave. Takimi i sotëm, ndërkaq është cilësuar edhe takimi i parë i dialogut Prishtinë-Beograd.

“Takimi i sotëm vjen pas takimeve që zhvillova në New York me presidentin Nikolliq dhe kryeministrin Thaçi. Pas takimeve të ndara me ta, udhëhoqa një takim të përbashkët në zyrën time, i cili u mbajt në një atmosferë të mirë dhe konstruktive”, ka thënë baronesha Ashton. “Kryeministrat i kanë zgjatur dorën njëri-tjetrit, sepse kështu parashikon protokoli ynë”, deklaroi një burim nga zyra e Ashton, citon DW. Sipas burimeve diplomatike, takimi i parë mund të shërbejë vetëm si sinjal për fillimin e një procesi i cili mund të zgjatë relativisht shumë. Baronesha Ashton, ndërkaq do të jetë udhëheqëse e dialogut mes Kosovës dhe Serbisë që ka për qëllim normalizimin e marrëdhënieve mes dy vendeve. “Ne u pajtuam që ta vazhdojmë dialogun për normalizimin e marrëdhënieve ndërmjet të dyja palëve, ndërsa të dytë u zotuan për bashkëpunim. Do të takohemi prapë së shpejti”, citojnë mediat e Prishtinës baroneshën Ashton. Ndërkaq në deklaratën  e përbashkët thuhet se dialogu është në interesin e të dyja palëve. “Qëllimi i tij është të përmirësohet jeta e njerëzve dhe të ndihmojë në zgjidhjen e problemeve e, duke e bërë këtë, ta sjell Serbinë e Kosovën më afër Bashkimit Evropian”, thuhet në deklaratën e lëshuar nga Zyra e Ashton.

Ky është takimi i parë zyrtarë ndërmjet dy kryeministrave. Në të kaluarën ata kanë përfaqësuar dy vijat ekstreme. Kryeministri Hashim Thaçi ka qenë drejtor politik i UÇK-së, ndërsa Ivica Daçiq ka qenë këshilltar dhe zëdhënës i ish-presidentit Sllobodan Milloshevq.