Nëse Vulin hyn në Kosovë, do të arrestohet

E nëse Vulin tenton që të hyjë në territorin e Kosovës ilegalisht, atëherë Policia e Kosovës do ta zbatojë ligjin

Ministri serb i Mbrojtjes, Aleksandar Vulin nuk ka leje të hyjë në Kosovë për të marrë pjesë në festën e Vidovdanit. Një gjë të tillë ia ka refuzuar Ministria e Jashtme.

E nëse Vulin tenton që të hyjë në territorin e Kosovës ilegalisht, atëherë Policia e Kosovës do ta zbatojë ligjin.

Kështu ka shkruar në një postim në “Facebook” këshilltari i Pacollit, Jetlir Zyberaj.

“Secili provokim që mund të bëhet, pasojat do ti bartë Beogradi ngase provokime te tilla i bën qëllimshëm. Partnerët ndërkombëtarë janë të njoftuar për secilin veprim tonin. Përtej konspiracioneve që rëndom prodhohen pastaj, është shumë e qartë se futja ilegale e kujtdo ne territorin e Kosovës, nënkupton zbatim te ligjit nga policia e Kosovës”, ka shkruar Zyberaj në Facebook, përcjell albifo.ch.

Situatë e ngjashme ka qenë edhe para disa muajsh kur Gjuriqit i ishte ndaluar hyrja në Kosovë. Ai kishte vendosur të hyjë ilegalisht, e më pas ishte arrestuar nga Policia e Kosovës, shkruajnë mediat vendore.

Ndryshe në orët e mëngjesit forca të shumta të Policisë janë nisur për në Veriun e Mitrovicës.