Ambasada e Kosovës në Londër, në bashkëpunim me Odën Ekonomike Britaniko-Kosovare, organizoi këtë aktivitet me synimin për të nxitur tregtinë, investimet dhe krijimin e partneriteteve të reja ndërmjet Kosovës dhe Mbretërisë së Bashkuar, njofton albinfo.ch.
Gjatë panelit, ambasadori i Kosovës në Londër, Ilir Kapiti, theksoi rëndësinë e diplomacisë ekonomike në promovimin e potencialit investues të Kosovës dhe në tërheqjen e investitorëve britanikë. Ai vuri në pah gjithashtu nevojën për ndërtimin e partneriteteve të qëndrueshme mes bizneseve të të dyja vendeve.
Diskutimet dhe përvojat e ndara nga panelistët shërbyen për të identifikuar mundësi të reja bashkëpunimi dhe zhvillimi ekonomik. Organizatorët u bënë thirrje bizneseve dhe investitorëve nga të dyja vendet që t’i shfrytëzojnë këto mundësi dhe t’i kthejnë kontaktet në bashkëpunime konkrete./Albinfo.ch