Shtyhet për korrik ndryshimi i Ligjit për Dhomën e Posaçme

Kjo pasi pushteti nuk arriti t’i siguronte votat e mjaftueshme që ta ngarkonte Komisionin për Legjislacion që sot gjatë ditës ta shqyrtonte këtë projektligj, e i njëjti të trajtohej po sot në Kuvend

dpa/AFP/Archiv / dpa

Pas një marrëveshje mes ministrit të Drejtësisë, Abelard Tahiri dhe të gjitha grupeve parlamentare është vendosur që shqyrtimi i projektligjit për Dhomën e Posaçme të Gjykatës Supreme të shtyhet për datën 9 korrik. Kjo pasi pushteti nuk arriti t’i siguronte votat e mjaftueshme që ta ngarkonte Komisionin për Legjislacion që sot gjatë ditës ta shqyrtonte këtë projektligj, e i njëjti të trajtohej po sot në Kuvend.

Ministri i Drejtësisë ka thënë se janë të gatshëm që brenda kësaj periudhe të diskutojnë me Komisionin për Legjislacion dhe me secilin deputet në mënyrë që propozimet e tyre të përfshihen në projektligj.

Kuvendi ka vazhduar punimet me pika të mbetura nga seancat e kaluara, që kryesisht janë votime, e si pikë e fundit është renditur debati parlamentar në lidhje me Kornizën Afatmesme të Shpenzimeve 2019-2021.