Hoti: U tentua të kontrabandohej projektligji për Dhomën e Posaçme

“Kjo është logjika qeverisëse e këtij koalicioni që është duke e dëmtuar shtetin e Kosovës në baza ditore dhe ne shpresojmë se së shpejti do të përfundojë kjo mënyrë e qeverisjes"

Kryetari i Grupit Parlamentar të LDK-së, Avdullah Hoti, ka thënë se u tentua të kontrabandohej projektligji për Dhomën e Posaçme të Gjykatës Supreme.

Sipas Hotit, në seancën e sotme ishte paraparë të diskutohej për zëvendësimin e gjyqtarëve ndërkombëtarë të kësaj Dhome, por më pas doli një ligj me mbi 80 nene. Ai ka kritikuar edhe mospërfshirjen e dy projektligjeve nga Pakoja e Dytë Fiskale, që parashohin lehtësime, kryesisht për bujqit, të cilat sipas Hotit, nuk përkrahën vetëm se janë propozuar nga LDK-ja.

“Kjo është logjika qeverisëse e këtij koalicioni që është duke e dëmtuar shtetin e Kosovës në baza ditore dhe ne shpresojmë se së shpejti do të përfundojë kjo mënyrë e qeverisjes”, deklaroi Hoti. Ai ka mirëpritur edhe krijimin e dy komisioneve hetimore, një për deportimin e shtetasve turq, dhe atë për emërimet në shërbimin e lartë civil.