Thaçi raporton në Kuvend për takimin me Daqiçin

Kryeministri kosovar, Hashim Thaçi në seancën e radhës do të njoftoj ligjvënësit për nisjen e bisedimeve

Kryeministri Thaçi kërkoi nga Kryesia e Kuvendit që t’ia lejojë raportimin në Kuvend rreth takimit të parë me homologun serb, Ivica Daçiq. Kryesia ia mundësoi këtë. 

Kryeministri i Kosovës, Hashim Thaçi është shprehur i gatshëm për të raportuar në Kuvendin e Kosovës rreth takimit të parë me homologun serb, Ivica Daçiq. Shprehja “vullnetare” e kryeministrit është pranuar të hënën nga Kryesia e Kuvendit, dhe sipas kësaj të fundit, Thaçi në seancën e radhës do të njoftoj ligjvënësit për nisjen e bisedimeve.

Anëtarët e Kryesisë së Kuvendit dhe shefat e grupeve parlamentare që morën pjesë në mbledhje, nuk u shpreh të “entuziazmuar” nga ky vullnet i kryeministrit. Ata thanë se Thaçi duhet të raportoj në Kuvend nëse shkelë vijat e “Kuqe”, në të kundërtën ai ka marrë lejen nga Kuvendi nëpërmjet rezolutës, për nisjen dhe vazhdimin e bisedimeve.  

“Rezoluta dhe Kuvendi i Kosovës është ai që do ta mbikëqyrë këtë proces. Unë nuk e di se çka do të bisedohet, por nëse kryeministri tenton të ndërmerr diçka që është kundër kushtetuese, atëherë ne nuk kemi çka t`i themi atij veç se ta qojmë në shtëpi”, tha shefi i Grupit Parlamentar të Lidhjes Demokratike të Kosovës, Ismet Beqiri.

Ndërsa nënkryetari i Kuvendit të Kosovës, Xhavit Haliti, tha se dialogu me Serbinë do të merr drejtimin e duhur, kur dihet se ky dialog ndërmjetësohet nga Bashkimi Evropian. “Jam i bindur se bisedimet do të marrin drejtimin e duhur sepse ato janë të monitoruara dhe të organizuara nga BE-ja dhe SHBA-të”, tha Haliti, raporton RTK.