Minatorët e Trepçës protestojnë për statusin e kësaj ndërmarrjeje

Minatorët kanë kërkuar që tu plotësohen kërkesat e tyre ndërsa kanë paralajmëruar se nëse nuk merr masa Kuvendi i Kosovës dhe Qeveria e Kosovës, minatorët e “Trepçës” do të protestojnë dhe do të dalin në grevë të përgjithshme.

Dhjetëra minatorë të Trepçës kanë protestuar para objektit të Kuvendit të Kosovës, duke kërkuar plotësimin e disa kërkesave nga Kuvendi dhe Qeveria.

Minatorët kanë kërkuar njohjen e pensioneve dhe 70 për qind të pagës, mosha e pensionimit për ta të jetë nga 50 deri në 55 vjet, të krijohet Ligji për invalidët e punës, të kenë përvojë të benificuar, sigurim shëndetësor të punës, njohje të përvojës së punës për vitet 1989-99 dhe pension familjar.

Kryetari i BSPK-së, Avni Ajdini, ka thënë se protesta e sotme e minatorëve të Trepçës ia kujtonte të kaluarën, por ka shtuar se edhe kësaj radhe nuk do të lëshojnë pe për kërkesat e tyre.

Megjithëse kërkesë e tyre ishte që të takoheshin me kryeministrin dhe kryeparlamentarin, para tyre dolën deputetët e VV-së Sami Kurteshi, Fitore Pacolli  dhe Xhelal Sfeçla, si dhe deputeti i Nismës, Milaim Zeka, të cilët u premtuan protestuesve se do ta kenë përkrahjen e tyre.