Berisha: 40 serbë janë larguar nga FSK-ja, do të zëvendësoheshin me të tjerë

40 pjesëtarë të FSK-së të komunitetit serb janë larguar nga FSK

Ministri i Forcës së Sigurisë së Kosovës, Rrustem Berisha, në një konferencë për media ka folur për fenomenin e fundit të largimit të pjesëtarëve serbë të kësaj force pas presioneve që po iu bëhet atyre nga Beogradi.

“MFSK vlerëson se këto kërkesa për largim vijnë si pasojë e sulmeve të qëllimshme që i janë bërë FSK-ë, posaçërisht pjesëtarëve të komunitetit serb”, ka thënë Berisha duke shtuar se të larguarit do të zëvendësohen me pjestarë të ri nga ky komunitet.

Ai i ka quajtur tentime për ta dëmtuar progresin dhe të arriturat e FSK-së, si dhe imazhin e saj si institucioni më i besueshëm në Kosovë.

“Vërtet ndjej keqardhje për pjesëtarët tanë që s’janë lejuar të vendosin lirshëm për të ardhmen e tyre .Pjesëtarët e FSK-së nga komuniteti serb kanë qenë shumë mirë të integruar në kuadër të strukturës së FSK-së dhe kanë qenë në nivel të përgjegjësive dhe detyrave të tyre. Prandaj kërcënimet dhe shantazhet e bëra janë të papranueshme, dhe janë shkelje të të drejtave të njeriut”, ka thënë ministri.

Ministri ka thënë se rastet e largimit nuk janë individuale por grupore që sipas tij deri tash numri ka shkuar në 40.

Ditë më parë për këtë çështje kryeministri Haradinaj mblodhi Këshillin e Sigurisë së Kosovës pas së cilës tha se janë marrë hapa për ta ndaluar këtë fenomen.