Kurti: Idetë për shkëmbim territoresh, mashtrime të reja

Përfaqësues të shqiptarëve nga Luginës janë pritur edhe nga drejtuesit e Lëvizjes Vetëvendosje.  Kryetari i kësaj partie, Albin Kurti, ka thënë se shqiptarët e Luginës së Preshevës kanë paguar çmimin më të lartë përgjatë viteve.

Kurti konsideron se nëse opsioni për shkëmbim territoresh me Serbinë mund të ngjajë pas disa javësh, atëherë do t’i sjellë Kosovës pasoja të pariparueshme.

“Idetë që po plasohen në opinion për shkëmbim të territoreve apo korrigjim të kufijve janë mashtrime të reja”, ka thënë ai.

Sipas Kurtit, motivet e palëve në dialogun e Brukselit nuk kanë të bëjnë as me serbët në Kosovë dhe as me shqiptarët në Serbi, porse ndërlidhen me motivet e Beogradit që sa më shpejt të përafrohet me BE-në, kurse për lidershipin e Kosovës që të jetë sa më larg Gjykatës Speciale.

E deputetja Albulena Haxhiu ka kritikuar presidenti Thaçi që, sipas saj, po të mos i ftonte Vetëvendosja përfaqësuesit e Luginës, Thaçi kurrë nuk do t’i kishte ftuar ata në takim.

Ndërsa përfaqësuesit e Luginës kanë përsëritur kërkesën që çështja e tyre të bëhet pjesë e bisedimeve në Bruksel.

Ata kanë kërkuar që Kosova të aplikojë reciprocitet, në mënyrë që qytetarët në këtë pjesë të kenë të drejta të njëjta me serbët në pjesën veriore të Kosovës.