Sipas të dhënave të Agjencisë së Statistikave të Kosovës, gjatë shtatorit 2026 janë realizuar 2,548 fluturime, 6.5 për qind më shumë se në të njëjtin muaj të vitit të kaluar. Ndërkaq, transporti hekurudhor ka shënuar rënie të numrit të udhëtarëve, trasmeton albinfo.ch.
Transporti ajror në Kosovë ka shënuar rritje gjatë muajit shtator 2026, si në numrin e fluturimeve të realizuara, ashtu edhe në numrin e udhëtarëve, krahasuar me periudhën e njëjtë të vitit të kaluar.
Sipas të dhënave të publikuara nga Agjencia e Statistikave të Kosovës (ASK), gjatë këtij muaji janë realizuar 2,548 fluturime, apo 6.5 për qind më shumë se në shtatorin e vitit 2025, kur ishin regjistruar 2,392 fluturime.
Rritje është regjistruar edhe te numri i udhëtarëve. Në total, transportin ajror e kanë shfrytëzuar 393,360 udhëtarë, që paraqet një rritje prej 4.9 për qind krahasuar me shtatorin e vitit të kaluar, kur ishin regjistruar 374,982 udhëtarë.
Nga numri i përgjithshëm i udhëtarëve, 171,168 ishin në ardhje, ndërsa 222,192 në shkuarje. Krahasuar me të njëjtën periudhë të vitit 2025, numri i udhëtarëve në ardhje është rritur për 3.4 për qind, ndërsa ai i udhëtarëve në shkuarje për 6.1 për qind.
Ndryshe nga transporti ajror, ai hekurudhor ka shënuar rënie. Sipas ASK-së, në shtator 2026 me tren kanë udhëtuar 7,167 persona, apo 12.8 për qind më pak se në të njëjtin muaj të vitit 2025.
Po ashtu, gjatë këtij muaji nuk është realizuar transport i mallrave përmes hekurudhave.
Të dhënat e ASK-së tregojnë kështu ecuri të ndryshme të dy formave të transportit gjatë muajit shtator, me rritje në transportin ajror dhe rënie në atë hekurudhor./Albinfo.ch