Tetovarja, studentja më e mirë

Blerta Pajaziti ish-studente e Universitetit të Evropës Juglindore nga Tetova e Maqedonisë, e cila aktualisht është në përfundim të studimeve posdiplomike në fushën e Menaxhimit pranë Fakultetit Ekonomik në Universitetin e Luganos në Zvicër, është zgjedhur studentja më e mirë.

Çdo vit, Universiteti i Luganos në bashkëpunim me kompani globale të cilat janë pjesë e rrjetit “Network USImpresa”, ndajnë bursa për studentët më të mirë të çdo drejtimi post-diplomimi. Bursat, secila me vlerë 4 mijë franga zvicerane, janë krijuar për të promovuar dhe për të nxitur trajnimin e burimeve njerëzore me kualifikim të lartë.

Çmimi është i bazuar ekskluzivisht në kritere akademike dhe përzgjedhja bëhet në fund të sesioneve të provimeve të vitit të parë, në fund të tetorit. Për të shpërndarë këto çmime, Universiteti i Luganos (USI) organizon ceremoni publike për dhënien e çmimeve, duke përfshirë mediet dhe kompanitë anëtarë të rrjetit “USImpresa”.

Këtë vit ceremonia është zhvilluar më 13 nëntor me ç’rast u shpallën fitues 12 studentë nga 12 drejtime Master, të nacionaliteteve të ndryshme : 2 nga Zvicra, 6 nga Italia, 1 nga Austria, 1 nga Gjermania, 1 nga Maqedonia, 1 nga Kanadaja.

Studentja Pajaziti në maj të këtij viti, bashkë me grupin e saj universitar prezantoi një biznes plan para Nobelistit Mohammad Yunus.

Për më shumë informacion lidhur me shpërndarjen e bursave klikoni më poshtë:

http://www.careerservice.usi.ch/en/aziende/usimpresa/usimpresa-borse.htm