Shtyhet afati për ofertuesit e PTK-së

Me rekomandim të investitorëve, afati për dorëzimin e ofertave për shitjen e PTK-së është shtyrë deri më 15 janar 2013

Komisioni Qeveritar për Privatizimin e Postës dhe Telekomit të Kosovës (PTK) ka vendosur që të shtyj deri më 15 janar 2013, afatin për dorëzim të ofertave për privatizimin e PTK-së. Kjo shtyje, siç thuhet në një njoftim, ka ardhur pas kërkesave të investitorëve.    

Komisioni Qeveritar për Privatizimin (KQP) në mbledhje analizoi progresin e deritanishëm në lidhje me procesin e privatizimit të PTK-së dhe vlerësoj se ky proces është duke vazhduar sipas standardeve më të larta ndërkombëtare. 

Ndërsa shtyrja e afatit, sipas KQP-së, është ndikuar edhe nga interesimi për mbështetje nga institucionet financiare, veçmas pas pranimit të Republikës së Kosovës si anëtare e BERZH-it, si dhe është bërë në pajtueshmëri me rekomandimet e këshilltarit të transaksionit dhe atij strategjik. 

Në takimin e fundit, KQP ka shqyrtuar komentet dhe kërkesat kryesore të investitorëve të parakualifikuar dhe ka miratuar kërkesat e dy investitorëve për plotësimet e konsorciumve. 

Në pajtueshmëri me rregullat e tenderit, KQP ka miratuar përfshirjen e Citigroup Venture Capital International Advisors (CVCI) në konsorciumin e Twelve Hornbeams S.a.r.l /Avicenna Capital LLC, dhe përfshirjen e Central Balkan Investments Limited (CBI) në konsorciumin e M1 International Ltd.  

“KQP shpreh bindjen se privatizimi i PTK-së do të sjellë efekte pozitive për ekonominë dhe qytetarët e Kosovës dhe garanton investitorët se do të vazhdojë të ndjekë standardet më të larta ndërkombëtare për transaksionet të tilla”, thuhet në njoftimin e KQE-së. 

“Involvimi i institucioneve të tilla serioze në proces, siç janë, BERZH dhe IFC (Korporata Financiare Ndërkombëtare), në mbështetje të kompanive të parakualifikuara është një garanci shtesë për suksesin e projektit”, konsideron KQP.  

Në bazë të vendimit të Komisioni Qeveritar i Privatizimit të PTK-së, kompanitë që parakualifikiar për blerjen e 75 për qind të aksioneve të PTK-së janë: Albright Capital Management LLC, në bashkëpunim me Portugal Telecom; Columbia Capital në konsorcium me ACP Axos Capital Gmbh, në bashkëpunim me British Telecom – Poloni (në pronësi të British Telecom); M1 International Limited; Turkcell dhe; Twelve HORNBEAMS në konsorcium me Avicenna Capital LLC, në bashkëpunim me Sofrecom (pjesë e France Telecom)