OEK, kundër vendimit për masat mbrojtëse për pemët

Oda Ekonomike e Kosovës, përmes një reagimi, ka dalë kundër vendimit të Qeverisë për aplikim të masave mbrojtëse për pemë dhe perime me shtetet e rajonit.

OEK-u thotë se ky vendim ka çrregulluar tregun vendor dhe ka ndikuar drejtpërdrejt edhe në çmimin final të produkteve për kompanitë përpunuese dhe tregtare, përcjell albinfo.ch.

“Përderisa nënkuptohet se qëllimi kryesor i këtij vendimi ishte mbështetja e prodhimit vendor, Oda Ekonomike e Kosovës dëshiron të potencojë se vendimi nuk ka marrë parasysh një segment madhor të industrive, asaj përpunuese dhe tregtare. Rrjedhimisht, çdo efekt pozitiv që është vërejtur te kompanitë prodhuese është mbipeshuar nga efektet negative te kompanitë përpunuese”, theksohet në reagim.

Oda Ekonomike apelon që para se të merren vendime të ngjashme në të ardhmen, të bëhen analiza dhe studime të detajuara lidhur me efektet dhe pasojat.